RANIAG TOY NASIPNGET A LUBONG KO

Raniag toy nasipnget a lubong ko  Gapu kadagiti agsasamusam a pakarikutan ti biag Nalidem ti lubong a paggargarawak iti inaldaw Kaslaak tay maysa a billit a naiwawa ken gumawgawawa Agmaymaysa piman a mangtamtaming ti bagbagina. Maysa nga aldaw dimteng ka iti biag ko a diak napakpakadaan Babaen iti kinasayaat mo in-inut a rimmaniag ti aglawlaw ko Dagiti ayat, pammateg ken pannakigayyem nga ipapaay mo Nagserbida a kired ken pigsak iti inaldaw nga panagdaliasat ko. Idi saan ka pay a dimteng iti biag ko Kayyarigak tay maysa a billit a nakadumog nga agmaymaysa Awanan gaway a mangparmek kinaliday a sagsagrapenna Kasla kayatnan ti agsuek ket baybay-an nan bagbagina. Ngem dimteng ka a kas maysa nga bulan Mangted raniag iti nasipnget a rabii Iti kasta malawagan ti dalan a daliasatek Ti desdes nga agturong iti ringgawis ni kinaragsak. Sika ti nagbalin a bulan toy pusok Sinilnagam kabayatan panagtutuok na Ita kayyarigakon tay maysa a billit Nawaya a tumatayab nga agpangato. Duata itan a siraragsak a mangsaranget Kadagiti karit ti biag a dumteng Ammok saannak a baybay-an Ta sika ti inted ti Dios a sarikedked ko.