TI NAKAISEM A KARABASA

No sumken ti liday, ugalikon ti rumwar nga mapan agpagnapagna tapno maiyaw-awan ko ti dagensen a marikriknak.Maysa nga aldaw, sabali a dana ti sinurot ko, dalan nga agturong iti maysa a waig nga adayo bassit iti balay mi.Adda nalabsak a balay ti intsik nga iti sanguanan ti arubayan na ket karabasa ti nakamula. Adu ti sabong ken bungana. Diak maawatan toy riknak ta ti panagkitak kadaydiay maysa nga bunga ken sabong ket kasla da is-iseman ti langit." Apay a kastoy ti panagkitak kadaytoy a bunga ken sabong ti karabasa?" nakunak iti bagik. Adda kadi kayat na nga ipasimudaag kaniak?

Diak napupuotan toy bagik, inaprosak dayta a bunga ken sabong ti karabasa.Toy pusok ken kararuak kasla da rimmagsak ket naaddaanak iti baro a namnama ken determinasyon nga ti tao mabalin na ti agbiag a naragsak iti laksid dagiti dagensen ti biag a sumangbay babaen iti panangbaliw iti taray ti panunot ket kitaen tayo ti nalawlawag a kaipapanan iti biag a saan laeng nga ti nalidem ti kitaen tayo. No matmatan tayo dagiti ulep, adda dagiti napuraw ken adda met dagiti nalidem nga ulep nga kasla da namnamsek ket inton saandan mabaelan a bagkaten ti linaon da, ibuyat dan nga isu ti tudo ket sibugan na ti namaga a daga a mangted dam-eg ken kinapresko nga ayamuom ken banglo iti aglawlaw. Sumalibukag dagiti mula, umarikiak dagiti manok iti bigbigat, dagiti tukak tumanagari da kas tanda ti ragsak a mariknada gapu iti kaadda iti danum a paglangoyan da.

Kasta tayo koma met. Saan a maliklikan dagiti parikut a dumteng isu nga nakasagana tayo koma a kanayon babaen iti napigsa a pammati tayo iti Dios iti kasta no marikna tayo nga kasla marpoug tayon, adda Dios a madadaan a kumapetan ken sumalipengpengan tayo ket madadaan met ti Dios a mangsaluad kadatayo. Kas man iti maysa nga upa nga addaan iti piek. No adda peggad ket sallukoban na dagiti piek na babaen kadagiti payak na. Ket no ikamang tayo dagiti dagensen tayo iti Dios, sumayaat ti panagrikna tayo ket maaddaan tayo manen iti ragsak nga awan umasping.

No dagiti pinarsua ti Dios a kas kadagiti billit, tukak kada manok ken dadduma pay ket ammo da ti agragsak, ti tao pay ngata a naparaburan iti nagpayduma a kinasirib ti saan a makabael nga agragsak? No naliday ti linaon ti panunot, aramiden tayo ti kabaelan tayo a mangbaliw iti linaon na. As the saying goes, " What the mind can conceive, we can achieve." No positibo ti linaon ti panunot tayo, makita tayo diay karabasa wenno ania a mula nga is-iseman na ti Dios nga isu't nangpartuat ti lubong.Isu nga umisem ken agragsak tayo ta ababa lang ti biag. Saan tayo nga ammo no ania ti dumteng iti sumaruno a bigat. Enjoy life while we can.