ITI RINGGAWIS NI ARAPAAP

ITI RINGGAWIS NI ARAPAAP

Maysaak  a nanumo a pinarsua

Nagtaud iti nakurapay a pamilia

Tuok ken rigat innak sinagaba

Arigna diakon mabaelan pay ida.

Iti laksid dagiti tuok a linak-am

Diak pulos simmuko a nagkarayam

Manipud iti rigat a namunganayan

Ta patiek adda gasat a malak-aman.

Kabayatan ti innak pannakigasanggasat

Adda  agrusing a namnama a maragpat

Babaen iti pigsa ken pammati a maipakat

Nga agtungpal iti panangtun-oy iti gasat.

Nagpuonak anus ken ling-et nga awan pumada

Ta patiek nga no usarek ti pigsak ken sirmata

Maaddaanak iti tarigagay nga agballigi

A manggaw-at iti arapaap a napili.

Pudno nga no usaren ti saka a magna

Iturong na ka iti umiso a pagnaen a dana

Ket babaen iti pinangaramat iti ima

Magaw-at ti ringgawis ni arapaap a nasirmata.

Impaayan na tayo ti Dios iti nasimbeng a panunot

Tapno maaramat tayo iti panangragpat

Iti kalkalikaguman tayo a ragsak

Nga itden ti balligi a nagaw-at.

Nagasat dagiti addaan iti anus ken namnama

Ta isuda ti makagun-od iti parabor a nagpaiduma

Manipud kadagiti naayat nga ima ti Dios Ama

A sarikedked iti panangtun-oy iti balligi nga impaay na.