Posts
Ta kinaulimek patauden na.
Saludsod ditoy nakem ken rikna
Saem ti umukuok kaungak
Keltayen na’t ragsak a sumangbay.
Tunggal darikmat nga aglabas
Segseggaak isasangpetna
Mensahe wenno tawagmo
Ngem nagtinnag laeng a sainnek.
Ita aglidemen ti lubong
Ngem nagtalinaedka a naulimek
Nagtiponen ti saem ken liday
Dagiti saning-i nagbalin a sangit.
Pudno kadi ti atapko
Ken napanunot ko?
Addan sabali ta pusom
Gapu’t kaawan ko’t dennam
Naumaka kadin nga agur-uray?
Kaykayatko tay masaktan
Basta maammuak ti kinapudno
Ngem tay agulimekka lattan
Gapu ta dinak kayat a masaktan.
Kaykayatko tay masaktan
Ngem tay mangnamnama’t awan
Biagko, ibagam ti kinapudno
Tapno ammok ti aramidek.
